Жалоловга икки бор ютқазган Торрес даъвогарлик жангида рингга чиқади

Халқаро бокс федерацияси (IBF) 22 январь куни супероғир вазн тоифасида кубалик Френк Санчес (рейтингда 3-ўрин) ва америкалик Ричард Торрес (рейтингда 4-ўрин) ўртасидаги Элиминатор, яъни саралаш жангини ўтказиш учун очиқ савдо ўтказади. Ушбу жанг ғолиби украиналик Александр Усик эгалик қилиб турган IBF чемпионлик камари учун мажбурий даъвогарга айланади.

Аслида Санчес ва Торрес ўртасидаги жанг ўтган йилнинг декабрь ойи бошидаёқ белгиланганди. Лекин боксчиларнинг жамоалари жанг ўтказиш бўйича икки томонлама музокараларни якунлаш учун муҳлат олишди. Якунда улар белгиланган муддатда келиша олишмади ва IBF очиқ савдо санасини белгилади.

Шунга қарамай, савдо бошланишидан олдин Санчес ва Торрес вакилларида жанг бўйича келишувга эришиш имконияти бор.

Эслатиб ўтамиз, чарм қўлқоп устамиз Баҳодир Жалолов икки бор Ричард Торресни мағлубиятга учратган эди. Аввалига 2019 йил Екатеринбургдаги жаҳон чемпионатида ҳамюртимиз америкалик рақибини чуқур нокаутга учратган. Кейин эса Токио-2020 Олимпиадаси финалида ҳам рақибидан устун келган.