Жасурбек Ортиқбоев Gran Prix Zagreb Open чемпиони, Ферузда кумуш, Илҳомда бронза, навбат Исломга!

Дунёнинг ўттизга яқин давлатидан юнон-рум кураши усталари иштирок этаётган мусобақада юртимиз спорт шарафини Равшан Рўзиқулов мураббийлигидаги полвонларимиз ҳимоя қилишяпти. Ҳозиргача бир нечта вазн тоифаларида ғолиб ва совриндорлар номи маълум бўлиб улгурди.

Қувонарлиси, -55 кг вазнда юртимиз шарафини ҳимоя қилган Жасурбек Ортиқбоев барча рақибларини енгиб, Загреб Гран-При турнири чемпионига айланди. У олтин медаль учун кечган беллашувда германиялик Фабиан Шмиттдан 9-0 ҳисобида устун келди. Шу вазндаги яна бир курашчимиз Илҳом Баҳромов эса италиялик Жиованни Френини енгиб, кумуш медалга эга чиқди. Гап шундаки, бу вазнда иштирокчилар сони кам бўлгани боис, беллашувлар айлана тизимда ўтказилди.

-60 кг вазндаги Феруз Тўхтаев бронза медали учун кечган баҳсда польшалик Мича Трашни мағлуб этишга муваффақ бўлди. Тахминан бир ярим соатлардан сўнг  Исломжон Баҳромов ушбу вазн чемпионлиги учун туркиялик Ахмет Уярга қарши гиламга чиқади. 

Ўтиш беллашувида италиялик Франческо Беллинодан 8-0 ҳисобида устун келган Мирзобек Раҳматов (-67 кг) бронза медали учун кечган учрашувда афсуски, молдовалик Дониёр Исламовга ютқазиб қўйди. Арам Варданян (-72 кг) эса бронза медали учун бўлиб ўтган баҳсда бир очко (8-9) фарқи билан финляндиялик Микко Пелтокангасдан енгилди. 

Демак, ҳозирча Ўзбекистон терма жамоаси ҳисобида 1 тадан олтин, кумуш ва бронза медаллари бор. Бироздан сўнг финалда гиламга чиқадиган Осиё чемпиони Исломжон Баҳромовга омад ва ғалаба ёр бўлишини тилаймиз.