Жавоҳир Синдаров Магнус Карлсенни ютди. Ҳамюртимиз кун якунига кўра Германиядаги турнир пешқадами бўлиб турибди. Абдусатторовнинг натижаси қандай?

Мусобақада икки шахматчимиз — Нодирбек Абдусатторов ва Жавоҳир Синдаров ҳам иштирок этмоқда.

Аҳамиятлиси, бугун ўтказилган бешта раунд якунига кўра, Жавоҳир Синдаров 4,5 очко жамғариб, мусобақа жадвалида америкалик Фабиано Каруана билан карвонбошилик қилмоқда. Нодирбек Абдусатторов ҳисобида эса 2,5 очко мавжуд.

Синдаров кун давомида германиялик Винсент Кеймер, америкалик Левон Ароньян, словениялик Владимир Федосеев ҳамда шахмат афсонаси, Норвегия вакили Магнус Карлсен устидан ғалаба қозонди. Ҳиндистонлик Гукеш Доммаражу билан баҳсда эса Жавоҳир дурангга рози бўлди.

Нодирбек Абдусатторов эса Гукеш, америкаликлар — Хикару Накамура ва Фабиано Каруана билан дуранг қайд этди. Тўртинчи раундда Винсент Кеймерга имкониятни бой берган Нодирбек бешинчи баҳсда Владимир Федосеевдан устун келди.