Жавоҳир Синдаров: "Натижа эмас, ўйин ҳақида ўйлаяпман"

"Мақсадга жуда яқинман, лекин олдинда яна иккита муҳим ўйин бор. Иккаласи ҳам қора доналарда. Шунинг учун натижа ҳақида ўйламасдан, шунчаки ўйнашга ҳаракат қиляпман. Турнирдаги вазият албатта босим беради. Бльюмбаум билан ўйинда ютишим керак бўлган позицияни юта олмадим. Шунда мураббийим менга: "Агар сен бу унвонга лойиқ бўлсанг, барибир уни оласан. Агар йўқ бўлса, демак янада кўпроқ ишлаймиз. Шунинг учун натижа ҳақида эмас, ўйин ҳақида ўйла", деб айтди. Ростини айтсам, бир пайт тайёргарлигимни унутиб қўйдим ва керакли юришни эмас, бошқа юришни тез қилиб юбордим. Бу хато эди. Лекин кейин ўзимни йиғиб олдим ва вазиятдан чиқиб кетдим. Бир оз вақт кетди, лекин ўйинни яна назоратга олдим. Омад ҳам ёрдам берди", дейди Синдаров.