Жавоҳир Синдаровда татимаган ғалаба, Магнус ва унинг жамоасида мағлубият

Ўз таркибига юлдуз шахматчиларни жамлаган олтита жамоа иштирокидаги мусобақа ўзининг ҳал қилувчи палласига етиб келди. Бугун турнирда ғолиб ва совриндорлар аниқланади. Ҳамюртимиз Жавоҳир Синдаров мусобақанинг бу йилги мавсумида Fyers American Gambits жамоаси шарафини ҳимоя қилмоқда. Жавоҳирнинг жамоасида қозоғистонлик Бибисара Ассаубаева, россиялик Данил Дубов, ҳиндистонлик Ниҳал Сарин, франциялик Марк-Андриа Маурицци ҳамда испаниялик халқаро мастер Сара Ҳадем ҳам бор. Синдаров жамоасининг биринчи —  Icon тахтасида дона сурмоқда.

Tech Mahindra Global Chess League турнирининг навбатдаги куни Жавоҳир Синдаров сардорлигидаги Fyers American Gambits жамоаси франциялик таниқли гроссмейстер Максим Вашье-Лаграв бошчилигидаги Cheq Mumba Masters жамоасига 6:11 ҳисобида имкониятни бой бериб қўйди. Синдаров рақиб сафидаги энг кучли рақибни мағлуб этди. Ниҳал Сарин эса ватандоши Пранешга кутилмаганда ютқазиб қўйди. Айнан шу мағлубият якунда Fyers American Gambits жамоасининг умумий ҳисобда ютқазишини таъминлади. 

Жавоҳирнинг жамоадошлари Даниил Дубов озарбайжонлик Шахрияр Мамедьяров билан, Бибисара Ассаубаева эса ҳиндистонлик жаҳон чемпиони Ҳарика Дроновалли билан дуранг ўйнади. Марк-Андриа Маурицци ҳамда испаниялик халқаро мастер Сара Ҳадем ҳам рақибларига ютқазишди.  

Магнус Карлсен бошчилигидаги Alpine Apl Pipers жамоаси ҳам бу турда Triveni Continental Kings клубидан кутилмаган мағлубиятни қабул қилиб олди. Биринчи доскада ўйнаган жамоа сардори Магнус Карлсен оқ доналарда ҳаракат қилганига қарамай, Алиреза Фирузджага имкониятни бой бериб қўйди. 

Мусобақанинг сўнгги куни олдидан Ganges Grandmasters ва Alpine Apl Pipers жамоалари 18 очкодан жамғариб, турнир жадвалида қўшҳокимликни юзага келтиришди. Бугун бу икки жамоа чемпионлик учун ўзаро дона суришади. Fyers American Gambits ва Cheq Mumba Masters жамоалари ҳисобида 15 очкодан бор ва бу икки жамоа бугун учинчи ўрин, яъни бронза медаллари учун ўзаро яна бир бор куч синашади. Бугун Синдаровнинг Fyers American Gambits жамоаси кечаги мағлубият учун реванш олишга уриниб кўради. Медаллар учун кечадиган ҳар икки жуфтлик ўйинлари икки учрашувдан иборат бўлади.