Жисмоний тарбия ва спорт вазирлиги ишчи гуруҳи Андижон вилоятида спортни янада ривожлантириш борасида кўмаклашмоқда

Бунда Андижон вилояти туман ва шаҳарларини тўрт ҳудудга бўлган ҳолда ишчи гуруҳнинг вазифалари белгилаб олинди ҳамда шунга кўра йўл харитаси ишлаб чиқилди.

Бугун тонгдан иш фаолиятига киришган ишчи гуруҳнинг бир гуруҳ вакиллари Андижон вилоятининг чекка ҳудуди ҳисобланган Хонабод туманидаги Болалар-ўсмирлар спорт мактаби ва унга қарашли спорт иншоотларининг бугунги ҳолатини ўрганишдан бошлаган бўлса, иккинчи гуруҳ вакиллари вилоятнинг Қўрғонтепа, Булоқбоши туманларида бўлди.

Бу ҳудудларда спорт мактаблари ва спорт таълим муассасаларининг кадрлари салоҳияти ва тренерларга бўлган эҳтиёжи ҳамда уни бартараф этиш бўйича мақсадли қабул бўйича таклифлари ўрганиб чиқилмоқда. Шунингдек, ҳудудларнинг спорт турларига ихтисослашуви, моддий техник базасининг ҳолатини янада ривожлантириш, спорт инвентарлари сони ва бугунги ҳолати, терма жамоа аъзоларини шакллантириш масалалари бўйича ишчи гуруҳ туман масъулларига яқиндан кўмаклашмоқда.

Бундан ташқари, ҳудудлардаги спорт мактаблари ва спорт таълим муассасаларининг бўш ер майдонлари ва улардан мақсадли фойдаланиш режаси бўйича тадбиркорлар томонидан киритилаётган таклифлар ҳам кўриб чиқилиб, икки томонлама манфаатли ҳамкорликни йўлга қўйиш бўйича тадбиркорлар билан юзма-юз очиқ суҳбатлар ўтказилмоқда.

Шунингдек, Андижон вилояти бўйлаб ташкил этилаётган жисмоний тарбия ва спорт тадбирларини республика бўйлаб оммавий ахборот воситаларида кенг ёритиб бориш жараёнлари ўрганилиб, бу бўйича амалий кўмак бериш масаласи тегишлича ҳал этилмоқда.

Эртага ишчи гуруҳ ўз фаолиятини давом эттириб, Жалақудуқ, Асака, Марҳамат ва Андижон туманларидаги ҳолатларни ўрганиб чиқади.

Якунда вилоят спортининг бугунги ҳолатини ўрганган ҳолда, ҳудудлардаги таклиф ва эҳтиёжлардан келиб чиқиб, ишчи гуруҳ томонидан Андижон вилоятида спортни янада оммалаштириш ва ривожлантириш бўйича махсус дастур ишлаб чиқилади.

Жисмоний тарбия ва спорт вазирлиги Матбуот хизмати