Жон Жонс UFC`га қайтишни ҳали ҳам истисно этмаяпти

Америкалик аралаш яккакураш устаси ҳар қандай вазиятлар ривожига тайёр туришга ҳаракат қилмоқда.

"Катта эҳтимол билан, мен бошқа жанг ўтказмайман, — деб ёзди Жонс ижтимоий тармоқдаги саҳифасида мухлиснинг саволига жавоб берар экан. — Лекин мен ҳали ҳам мунтазам равишда допинг тестидан ўтиб турибман. Эшикларни очиқ тутяпман, чунки келажакда нима бўлишини олдиндан айтиб бўлмайди".

Таъкидлаш жоизки, UFC қоидаларига кўра, жангчи ўз фаолиятини якунлаганини эълон қилганида, допинг-тест назоратидан чиқариб юборилади. Агар у кейинчалик қайтишга қарор қилса, октагонга фақат олти ойдан кейингина чиқиши мумкин. Шу вақт ичида у олдиндан огоҳлантирилмасдан камида икки марта допинг текширувидан ўтиши шарт.

Жонс 2025 йилнинг ёзида допинг-тестга қайтди ва ўшандан бери тўрт марта текширувдан муваффақиятли ўтди. Шу боис, у ҳозирда мажбурий кутиш даврисиз исталган вақтда жанг ўтказиш ҳуқуқига эга.