Жозе Альдо расман фаолиятини якунлади, у қўлқопларни октагон марказида қолдирди + ФОТО

Бразилиялик 39 ёшли жангчи томошабинларнинг давомли қарсаклари остида октагонга чиқди. У йиллар давомида ўзи учун шуҳрат келтирган қўлқопларини октагон ўртасида қолдирди. Рафиқаси ва қизи уни қўллаб-қувватлаш учун октагонга чиққанида эса кўз ёшларини тия олмади. 

Жозе Альдо иккинчи марта спортдан кетмоқда. У биринчи бор 2022 йилда Мераб Двалишвилига қарши жангда мағлуб бўлганидан кейин қўлқопларни михга илганди. Аммо UFC билан шартномада қолган бразилиялик бир нечта жанг ўтказди, жумладан, Жереми Стивенс билан шиддатли жангда дуранг қайд этди.

Кетишини эълон қилинганидан икки йил ўтмай, Альдо кутилмаганда UFC’га қайтди ва 2024 йилнинг май ойида Рио-де-Жанейродаги турнирда Жонатан Мартинесни ҳакамларнинг якдил қарори эвазига мағлуб этди. Бу ғалаба якунда унинг фаолиятидаги сўнггиси бўлди. Шундан сўнг у ҳакамларнинг айри қарори билан Марио Баутистага, шу йилнинг май ойида эса баҳсли жангда Захабига ютқазди.

Агар бу чиндан ҳам охири бўлса, Жозе Альдо аралаш яккакурашларда 32 ғалаба ва 10 мағлубият билан кетади. У кетма-кет еттита чемпионлик ҳимоясини ўтказиб, ташкилотнинг ярим енгил дивизиони тарихидаги энг узоқ муддатли чемпион бўлиб қолмоқда. Жозе 2023 йилда UFC Шон-шуҳрат залига киритилди.