Кабо-Верде мураббийи Уругвай билан ўйиндаги сенсацион натижа ҳақида гапирди

"Жамоани ва барча футболчиларимизни бор кучларини бериб, кўрсатган ўйинлари учун табрикламоқчиман. Биз ўйинни жуда қийин шароитда якунладик, кўплаб футболчиларимизнинг оёқларининг томири тортишиб қолди. Шунга қарамай, жамоамиз бутун учрашув давомида мардонавор ҳаракат қилди, доимо ғалабага интилди ва бу бизни жуда қувонтиради. Биз барча ўйинчиларимизга ишонамиз. Таркибда доим ўзгаришлар қиламиз ва жамоамиз майдонга яхши ташкил этилган ўйин ҳамда ғалаба иштиёқи билан чиқишда давом этади. Бугунги эришган натижамиздан фахрланишимиз керак", — дея Бубиштанинг сўзларини келтирмоқда ФИФА расмий сайти.