"Какадан кейин "Олтин тўп" йўқ!": Адриано Галлиани Италия футболидаги таназзул сабабларини айтди

Эслатиб ўтамиз, "Скуадра Адзурра" кеча Босния ва Герцеговинага имкониятни бой бериб (1:1, пен. 1:4), кетма-кет учинчи бор мундиалсиз қолди.

"Серия А вакили охирги марта "Олтин тўп"ни олганида жамоамизда Кака ўйнарди (2007 йил). Бир пайтлар "Милан"да Франко Барези ва Паоло Мальдинилар тўп тепарди — ҳозир эса ҳамма нарса ўзгариб кетди. Бугун эшитаётган юзаки таҳлилларимиздан кўра муаммо анча чуқурроқ.

1990 йилда Италия клублари бир мавсумнинг ўзида ҳам Европа чемпионлар кубоги, ҳам Кубок эгалари кубоги ва УЕФА кубогини қўлга киритган эди. Ўшанда италян клублари доимий равишда финалларда ўйнарди. Ҳозир эса ҳам клублар, ҳам терма жамоа даражасида пасайиш кузатилмоқда. Статистикани севувчи инсон сифатида шуни айтаманки, Серия Ада тўп узатиш тезлиги Европадаги энг паст кўрсаткичлардан бири бўлиб қолмоқда", — деди Галлиани "Sky Sport" эфирида.

Италия футболининг "олтин даври"ни кўрган Галлианининг бу сўзлари бугунги аччиқ ҳақиқатни акс эттирмоқда. Кетма-кет муваффақиятсизликлардан сўнг Италия футболида катта ислоҳотлар даври бошланиши кутилмоқда.