Камбосос Ломаченко - Комми жангига нега бормаганини айтди

Енгил вазн тоифасида мутлақ жаҳон чемпиони Жорж Камбосос-жуниор (20-0, 10 KO) Василий Ломаченко ва Ричард Комми  (31-4, 27 KO) ўртасидаги жангга бормаганининг сабабини маълум қилди.

Австралиялик ўзининг Лопес устидан қозонган ғалабасидан сўнг Девин Хейни ва Жервонт Дэвисларнинг жангларида иштирок этди, лекин украиналик боксчининг жангини кузатмади ва ўша куни АҚШдан кетди.

"Лопесга қарши жангимдан олдин ўзимга-ўзим унинг камарларини оламан, кейин эса Хейни ва Дэвиснинг жангини кузатаман дегандим. Мен фақат Лопес билан жангни ва бу учун қилинадиган қурбонликлар ҳақида ўйлардим. Лекин энг кўп жабрни рафиқам кўрди. Бизнинг уч нафар фарзандимиз бор.

Мен Америка журналистлар ассосиацияси мукофоти учун кечки овқатга келдим, кейин Нью-Йоркка қайтиб, Ломаченко - Комми жангига бормоқчи бўлдим. Аммо, уйда мени уч фарзандим кутарди ва мен уларни кўришни истадим", — дея Камбососнинг сўзларини келтиради The Ring.

Диёр Мавлонов тайёрлади