Канело — Мунгия оқшомининг пуллик PPV-карди эълон қилинди

Оқшомнинг марказий жанги иккинчи ўрта вазн (76,2 кг) тоифасида мутлақ жаҳон чемпиони, мексикалик Сауль Альварес (60-2-2, 39 KO) ҳамда унинг мағлубият нималигини билмай келаётган ватандоши Хайме Мунгия (43-0, 34 KO) ўртасида ўтказилади. Ташкилотчилар ушбу турнирнинг пуллик трансляция қиланадиган жанглар рўйхатини ошкор этишди. 

Табиийки, рўйхатнинг биринчи поғонасида мексикаликлар ўртасидаги марказий жанг турибди. Иккинчи ўринда яримўрта вазн (66,7 кг)да вақтинчалик WBC чемпиони, америкалик Марио Барриос (28-2, 18 КО) ҳамда аргентиналик Фабиан Майдана (22-2, 16 КО) жанги турибди.

Оқшом доирасида ярименгил вазн (57,2 кг) тоифасида вақтинчалик WBC чемпион, америкалик Брэндон Фигероа (24-1-1, 18 КО) ватандоши, иккинчи енгил вазнда собиқ жаҳон чемпиони Жесси Магдалено (29-2, 18 КО)га қарши рингга кўтарилади.

Яримўрта вазн (66,7 кг) тоифасида WBA Regular чемпиони, литвалик Эймантас Станионис (14-0, 9 КО) икки йиллик танаффусдан сўнг рингга қайтмоқда. 2022 йилнинг апрель ойида ҳозирча сўнгги жангини ўтказган Эймантас 5 май тонгида венесуэлалик Габриэл Маэстре (6-0-1, 5 КО) билан тўқнаш келади. Айнан мана шу жанглар Канело — Мунгия оқшомининг пуллик PPV-кардидан ўрин олди.