Каратэчиларимиз Дубайдан қуруқ қўл билан қайтишди. Шунга ўрганиб қолмаяпмизми?

Ушбу нуфузли мусобақада дунёнинг 86 мамлакатидан 737 нафар каратэчи совринли ўринлар ҳамда Олимпия рейтинг очколари учун баҳс олиб борди. Беллашувларда Ўзбекистон терма жамоаси аъзолари ҳам иштирок этдилар.

Афсуски, аввалги Премьер Лига мусобақаларида бўлгани каби бу сафар ҳам ҳеч бир спортчимизга шохсупага кўтарилиш насиб қилмади. Садриддин Сайматов, Достонбек Отаболаев, Барно Мирзаева сингари тажрибали спортчиларимиз ўзларига билдирган ишончни оқлай олишмади.  

2017 йили -60 кг вазн тоифасида дунёнинг энг яхши каратэчиси бўлган Сайматов Дубай турнирида 11-ўрин билан кифояланди. Унинг вазнида бир йўла икки қозоғистонлик спортчи шохсупага кўтарилди. Дархан Ассадилов олтин, Қайсар Алписбай бронза медалини қўлга киритди. Айнан Сайматовнинг 11-ўринни эгаллагани БАА турниридаги энг яхши натижамиз бўлди. 

Шу ўринда ҳақли савол туғилади: мусобақалардан медалсиз қайтишга ўрганиб қолмаяпмизми? Токио Олимпиадасига эса ҳеч қанча вақт қолгани йўқ. Каратэ илк бор тўрт йилликнинг энг нуфузли мусобақаси дастурига киритилган. Бу кетишда Олимпиада-2020нинг каратэ мусобақаси ўзбекистонлик спортчиларсиз ўтади, шекилли.  

Терма жамоамиз Дубайда қуйидаги таркибда қатнашди:

Эркаклар:

-60 кг: Садриддин Сайматов

-67 кг: Иқболжон Узоқов

-67 кг: Санжар Абдукаримов

-75 кг: Дастонбек Отаболаев

Аёллар:

-50 кг: Баҳринисо Бобоева

-61 кг: Барно Мирзаева

Мураббийлар: Ўктам Бекпўлатов, Дилноза Бакирова

Суратда - Баҳринисо Бобоева (Осиё ўйинлари кумуш медали совриндори)