Конор Макгрегор Ирландия президенти лавозимига номзодини қўймоқчи

У ўз ҳамюртларини сайловда унга овоз беришга чақирди.

"2026 йилнинг 12 июнига қадар Ирландия Европадаги Миграция пакти талабларини тўлиқ бажариши керак. Бу шундан далолат берадики, ушбу муддатга қадар парламентнинг ҳар икки палатаси бир қанча қонунларни қабул қилиши, президент эса уларни имзолаши шарт.

Кейинги президентлик сайловлари 2025 йил 11 ноябрга қадар ўтказилиши керак. Мендан ташқари ким ҳукуматга қарши чиқиши мумкин? Улар номзод қилиб кўрсатмоқчи бўлган хеч бир шахс ҳукуматга қарши тура олмайди. Лекин мен бунга қодирман!

Президент сифатида мен бу қонун лойиҳасини референдумга қўяр эдим. Мен бу пактга мутлақо қарши бўлсам ҳам, бу мендан ёки ҳукуматдан эмас, Ирландия халқига тегишли қарор. Ва ҳамиша шундай бўлган! Бу ҳақиқий демократия!

Амалдорларимиз бу пактни нега жон-дилдан қўллаб-қувватлаётганини эшитиш менга қизиқ бўлар эди. Мен баҳсларни тинглаб, ундан кейинги овоз бериш жараёнини кузатишдан мамнун бўлар эдим! Мен президент бўлганимда, Ирландиянинг келажаги шундай бўлади. Ҳар бир ирландиялик ўз фикрини билдириш ва ўз келажагини мустақил белгилаш имкониятига эга бўлиши керак!

Ирландия, танлов сенда, ва бу танлов жуда оддий. Менга овоз бер ва биз биргаликда Ирландияни қутқарамиз!" — деб ёзди Макгрегор ўз ижтимоий тармоқдаги саҳифасида.