Кроуфорд Канелога қарши жангдан қанча гонорар олишини очиқлади

Америкалик 37 ёшли боксчи мексикалик афсонага қарши иккинчи ўрта вазн (76,2 кг) тоифаси мутлақ жаҳон чемпионлиги учун жанг ўтказади. Теренс бўлажак жангдан қанча гонорар ишлаб олишини айтди.  

"Мен 10 миллион доллар оламан. Сиз буни ёлғон деб ўйлаяпсизми? Қаердан сизда бундай ўй-фикр? Бу жанг мен учун пулдан ҳам муҳим. Авлодларим учун бу жангга розилик берганман. Ғалаба қозонсам, учта вазн тоифасида мутлақ жаҳон чемпиони бўламан. Бунга оз қолди", — дея Кроуфорднинг сўзларини келтиради Sportskeeda портали.

Эслатиб ўтамиз, Кроуфорд сўнгги жангини ўтган йилнинг 4 август куни Лос-Анжелесда ҳамюртимиз Исроил Мадримовга қарши ўтказиб, ҳакамларнинг якдил қарори (116-112, 115-113, 115-113) билан очколар ҳисоби бўйича ғалаба қозонганди. Альварес эса 4 май куни Ар-Риёдда Уильям Скаллни мағлуб этган эди.