05 апр 10:22
Янгиликлар

Бокс/ММА

Кроуфорд ва Спенс мутлақ жаҳон чемпионлиги учун жанг ўтказади

Америкалик мағлубият нималигини билмай келаётган боксчилар ўзаро мутлақ жаҳон чемпионлик камари учун жанг ўтказиш бўйича келишиб олишди.

Яримўрта вазн (66,7 кг) тоифасида америкалик жаҳон чемпионлари Эррол Спенс (28-0, 22 KO) ҳамда Теренс Кроуфорд (39-0, 30 KO) ўртасидаги мутлақ чемпионлик учун жанг ўтказилади, деб хабар бермоқда The Ring нашри.

Ушбу супержанг 18 июнь куни АҚШнинг Невада штати Лас-Вегас шаҳрида бўлиб ўтади. Апрель ойининг охирларида мутлақ жаҳон чемпионлиги учун кечадиган жанг расман эълон қилинади.

Маълумот учун, 35 ёшли Теренс Кроуфорд ўтган йилнинг декабрь ойида WBO чемпионлик камарини россиялик Давид Аванесяндан муваффақиятли тарзда ҳимоя қилган эди. У олтинчи раундда рақибини нокаутга учратганди.

33 яшар Эррол Спенс эса сўнгги жангини 2022 йилнинг апрель ойида ўтказганди. Ўшанда у кубалик Йорденис Угасни ўнинчи раундда мағлубиятга учратиб, WBC, WBA Super ва IBF камарларини бирлаштириб олганди.