Кучли жамоаларни таслим этган Uzbekistan Team блиц бўйича Жаҳон чемпионати совриндорига айланди

Мукофот жамғармаси 310 минг еврони ташкил этувчи ушбу нуфузли мусобақада 40 дан ортиқ жамоа таркибида 300 нафардан зиёд шахматчи чемпионлик учун курашди. 

Қувонарлиси, жамоавий жаҳон чемпионатида етакчи гроссмейстерларимиздан таркиб топган Uzbekistan Team жамоаси блиц йўналиши бўйича совриндорлар сафидан жой олди. Бронза медали учун кечган драматик баҳсда ҳамюртларимиз таркибида Алиреза Фирузджа, Левон Аронян, Володар Мурзин, Аниш Гири, Дивия Деҳмуш сингари гроссмейстерлардан таркиб топган Hexamind Chess Team жамоасини ҳал қилувчи тай-брекда таслим этишди. 

Дастлабки учрашувда Hexamind Chess Team жамоаси 4-2 ҳисобида зафар қучди. Иккинчи баҳсда Uzbekistan Team 3,5-2,5 ҳисобида ғалаба қозониб, мувозанатни тиклади. Ҳал қилувчи тай-брекда эса Нодирбек Абдусатторов, Жавоҳир Синдаров, Нодирбек Якуббоев, Муҳиддин Мадаминов сингари гроссмейстерларимиздан таркиб топган жамоамиз номдор рақибларини "сочиб" ташлади - 5,5-0,5!      

Шу тариқа, Uzbekistan Team жамоаси блиц йўналиши жаҳон чемпионатининг бронза медали совриндори ҳамда 30 000 АҚШ доллари миқдоридаги мукофот пули соҳибига айланди. Чорак финалда Uzbekistan Team блиц бўйича кетма-кет икки йилдан бери жаҳон чемпиони бўлиб келаётган Магнус Карлсен бошчилигидаги WR Chess жамоасини икки ўйин натижасига кўра мағлубиятга учратиб, 1/2 финалга йўл олганди. 

Uzbekistan Team жамоаси таркиби:

Жавоҳир Синдаров (GM, 2718)

Нодирбек Абдусатторов (GM, 2703)

Нодирбек Якуббоев (GM, 2569)

Шамсиддин Воҳидов (GM, 2527)

Муҳиддин Мадаминов (GM, 2500)

Афруза Ҳамдамова (WGM, 2358)

Умида Омонова (WGM, 2276)

Акжол Раҳматуллаев (1600)

Жамоа сардори — Рустам Қосимжонов.