Кураш бўйича XV Жаҳон чемпионати мезбони эълон қилинди

Эрон Ислом Республикасининг Шимолий Хуросон вилояти маркази — Божнурд шаҳри Кураш бўйича катталар ўртасидаги XV Жаҳон чемпионатига мезбонлик қилади.

Ушбу нуфузли мусобақа жаҳоннинг энг кучли полвонларини бир жойга жамлаш баробарида, Курашнинг халқаро нуфузини янада мустаҳкамлаш, спорт дипломатияси ва маданий мулоқотни ривожлантиришга хизмат қилади. Чемпионат доирасида IKA Бошқарув қумитаси йиғилиши, IKA Навбатдаги Конгресси, халқаро ҳакамлар ва мураббийлар семинарлари, антидопинг бўйича ўқув машғулотлари ҳам ташкил этилади.

Мусобақалар Божнурд шаҳридаги “Alidokh” спорт мажмуасида бўлиб ўтади. Ташкилотчи сифатида Эрон Кураш Ассоциацияси иштирокчилар учун юқори даражадаги ташкилий тайёргарлик, хавфсизлик, логистика ва замонавий инфратузилмани таъминлаш учун иш олиб бормоқда. Делегациялар Машҳад халқаро аэропорти орқали кутиб олинади ва маҳаллий транспорт билан таъминланади.

Жаҳон чемпионати Халқаро Кураш Ассоциациясининг амалдаги қоидалари асосида ўтказилади ҳамда мусобақа натижалари бўйича WSP рейтинг очколари тақдим этилади. 

Мазкур дунё биринчилигига IKAга аъзо бўлган миллий федерациялар ҳар бир вазн тоифасида битта спортчи билан иштирок этиши мумкин.