London Chess Classic 2025. Нодирбек Абдусатторовда кетма-кет учинчи ғалаба!

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам бош соврин учун кураш олиб боряпти. Биринчи даврада британиялик гроссмейстер Гаваин Жонс билан дуранг ўйнаган ҳамюртимиз кетма-кет учта ғалабага эришди. 

Абдусатторов иккинчи турда оқ доналарда ҳиндистонлик Мишра Абҳиманюни, учинчи турда қора доналарда Англия шарафини ҳимоя қилаётган россиялик гроссмейстер Никита Витюговни чиройли тарзда таслим этганди. 

Кеча London Chess Classic 2025 турнирининг тўртинчи турида Нодирбек яна қора доналарда ўйнади. Бу сафар у Буюк Британия чемпиони, 54 ёшли тажрибали гроссмейстер Майкл Адамсни мағлубиятга учратди. Адамс бунгача учта турда дуранг натижа қайд этиб, турнир жадвалида 1,5 очко билан 4-ўринни банд этиб турган эди. 

Турнирда биринчи рақам остида таснифланган франциялик Алиреза Фирузджа бу турда ғалаба қозонишга муваффақ бўлди. У оқ доналаларда украиналик гроссмейстер Павел Эльяновдан устун келди. Грециялик Николас Теодору эса Никита Витюгов билан муросага келди. Бугун Абдусатторов 5-турда айнан Теодоруга қарши оқ доналарда ўйнайди. 

Бугунги бешинчи тур олдидан Нодирбек Абдусатторов 3,5 очко билан якка пешқадам бўлиб турибди. Фирузджа 3 очко билан иккинчи ўринни банд этган бўлса, Теодору 2,5 очко билан кучли учликка якун ясаган.