Маҳмуд Мурадов: "Рақибим ва UFC раҳбариятидан узр сўрайман"

12 март тонгида Лас-Вегас шаҳрида (АҚШ) навбатдаги UFC Fight Night мусобақаси ўтказилади.

Ушбу мусобақа доирасида ўрта вазнда ўзбекистонлик UFC жангчиси Маҳмуд Мурадов (25-8) асли доғистонлик, ҳозирда Германия номидан жанг қилаётган Абусупьян Магомедовга қарши октагонга кўтарилиши лозим эди. Бироқ, Мурадовнинг жароҳат олиши натижасида жанг бекор қилинган эди.

Ҳамюртимиз мазкур ҳолатга илк бор муносабат билдирди:

"Ассалому алайкум. Барчага маълумки, 11 мартга белгиланган навбатдаги жангим ўнг қўлимнинг спаррингда жароҳат олгани туфайли бекор қилинди.

Нима бўлишидан қатъий назар, мухлисларимга қўллаб-қувватлаганлари ва илиқ тилаклари учун ўз миннатдорчилигимни билдирмоқчиман. Алҳамдулиллаҳ бугун шифокорлар билан биринчи муолажаларни амалга оширдик.

Операциясиз ўтамиз деган умиддаман. Қўллаб-қувватлаганингиз учун катта раҳмат. Рамазондан кейин Худо хохласа, албатта, октагонга қайтамиз.

Рақибим ва UFC раҳбариятидан узр сўрайман", - дея ёзиб қолдирган Маҳмуд Мурадов Instagram тармоғидаги расмий саҳифасида.