Маҳмуд Мурадов: "Хамзат иштирокидаги марказий жанг ўтказилади, фақат..."

Режа бўйича MFL 6 кечасининг марказий жанги қирғизистонлик Эдил Эсенгулов ҳамда россиялик Хамзат Чапанов ўртасида бўлиб ўтиши лозим эди. Аммо, жангга уч кун қолган бир пайтда Эдил жароҳат олди. 

Хўш, марказий жанг бекор тўлалигича бекор қилинадими? Ташкилотчилар Эдилнинг ўрнига бошқа рақиб топиб беришадими? Биз шу саволлар билан промоушен раҳбари Маҳмуд Мурадовга юзландик. 

"Жангга оз фурсат қолганида Эсенгуловнинг жароҳат олиш яхши бўлмади. Лекин бу спорт, унда шундай ҳолатлар ҳам бўлиб туради. Эсингизда бўлса, ўзимда ҳам худди шундай сабаб билан жангим бекор қилинган эди. Жароҳатлар спортнинг ажралмас бўлаги.  

Ҳозир Чапановга бошқа рақиб бериш устида ишлаяпмиз. Бугун чамаси 3-4 соатларда бу ҳақда расман эълон қиламиз. Эдилни алмаштиришга тайёр жангчилар бор. Уларнинг бири билан жанг учун шартнома имзолаймиз", - деди Мурадов. 

Маълумот учун, 8 июль куни соат 20:00да пойтахтимиздаги "Анҳор-Локомотив" паркида Face to Face (кўз уриштириш) ҳамда оқшом иштирокчиларини тарозидан ўтказиш маросимлари ташкил этилади.