Маҳмудовнинг менежери Уайлдерга жанг учун $ 20 млн таклиф қилди

Россиялик супероғир вазн тоифаси вакили Арасланбек Маҳмудовнинг менежери Камиль Эстефан мижозининг Уайлдер билан жангини ташкил қилишга уриниб кўради. 

"Сэмюель Питерни мағлуб этган Арсланбек ушбу вазн чемпионлари учун жиддий рақиб эканлигини исботлаб қўйди. Деонтей Уайлдерга жанг учун 20 миллион доллар тўлашга тайёрман. Фақат бу жанг Канаданинг Монреаль шаҳридаги Bell Center аренасида ўтказилиши лозим. Агар Тайсон Фьюри Деонтейни мағлуб этса, у ҳолда жангга британиялик боксчини чорлаймиз. Унга ҳам кафолатланган 20 миллион долларлик гонорар бор", - деди Эстефан. 

Маълумот учун, Маҳмудов якшанба тонгида нигериялик собиқ жаҳон чемпиони, фахрий боксчи Сэмюель Питерни биринчи раунднинг ўзидаёқ нокаутга учратган эди. Арсланбек профессионал боксда 10 та жанг ўтказиб, уларнинг барчасида рақибларини нокаутга учратган эди.