Мана нима учун бокс "ўлган"! Ломаченконинг мағлубиятига бокс олами вакиллари қандай муносабат билдирди?

Бу Ломаченконинг фаолиятидаги учунчи мағлубият бўлди. Жангдан кейинги матбуот анжуманида у: "Бугун нима бўлганини ҳамма кўрди. Мен ушбу жангда 100 фоиз ғалаба қозонган эдим", дея таъкидлади. 

Ҳакамлар қарорига келадиган бўлсак, 116-112, 115-113, 115-113 ҳисобида Хэйнининг устунлиги қайд этилди. Ломанинг менежери Эгис Климас: "Биз таслим бўлмаймиз. Натижадан норозимиз ва аппеляция берамиз. Кимдир бу адолатсизликка барҳам бериши лозим", - дея изоҳ билдирди.


Дунё бокси ва ММА оламининг кўз кўринган вакиллари Ломаченко – Хэйни қарама-қаршилиги натижасига қандай муносабат билдирди?

Боксчи Шакур Стивенсон: "Ломаченко сўзсиз жаҳон чемпиони бўлиши керак. У бу жангда ғалаба қозонган эди". 

UFC собиқ жангчиси Жош Томпсон: "Айнан мана шунақа хатоликлар сабабли инсонлар боксни томоша қилмай қўяди. Ҳакамлар хато қилди, бокс ўлмоқда...". 

Мураббий Тэдди Атлас: "Мен икки очколик фарққа чидаган бўлардим, лекин 116-112га эмас. Уларга моаш тўлайдиган спорт тури ҳақида тўлиқ текширув ўтказиб бўладими?" 

Боксчи Теренс Кроуфорд: "Натижадан ҳайратдаманми? Ростини айтсам, ҳа! Хэйни менинг дўстим, мен унга эргашдим. Аммо ҳисоб 116-112. Бу – жиннилик!".

Собиқ жаҳон чемпиони, айни дамда DAZN мутахассиси Серхио Мора: "Шиддатли жангда, одатда энг яхши ҳикоячи ҳакамларнинг фикри ва баҳоларига таъсир қилади. Лома бугун энг яхши ҳикояни айтди".

Собиқ жаҳон чемпиони Абнер Марес: "Кечирасиз, мен одатда бундай твит ёзмайман. Аммо бугун Ломаченко ғалабага ҳақли эди". 

Top Rank раҳбари Боб Арум: "Мен ҳакам эмас, промоутерман, лекин барча нейтрал мухлислар Василий учун бир ёқлама кураш бўлганини айтишди". 

Боксчи Жорж Камбосос: "Тенг жанг. Ломаченко сўнгги раундларда устундек кўринди".

Боксчи Райан Гарсия (твит кейинроқ ўчирилган): "Лома йирик ҳисобда ғалаба қозонди!!! Боксга зарар етказадиган нарса шу. Василий ютиши керак эди. Мен тушунмаяпман. Ўша ерда эдим. Лома кўпроқ зарба берганди".

Собиқ жаҳон чемпиони Рой Жонс: "Тўғрисини айтсам, дуранг бўлади деб ўйлагандим. Жуда яқин жанг бўлди ва Ломаченко чемпионлик раундларида (сўнгги раундлар) ғалаба қозонди. Одатда, бу раундлар қолганларига қараганда қимматроқ. Шунинг учун мен қуръа ташлашни таклиф қиламан". 

Промоутер Оскар Де Ла Хойя: "Лома йирик ҳисобда ғалаба қозонди!!! Ўзини ғалаба қозона олмадим, деб ҳисоблаган одам бокс ҳақида ҳеч нарса билмайди". 

Собиқ ESPN журналисти Дэн Рафаэль: "Ҳеч қандай талончилик бўлмаган. Икки ҳакам жангни бир раундда баҳолади. Мен дуранг, деб ўйлагандим. Ўта яқин жанг, бироқ Хэйнининг ғалабасига шубҳа қилмаган эдим". 

Хўш, сизнингча Ломаченко ва Хэйни жуфтлигида ким ғалаба қозонганди?