Мариус Визер янги тўрт йиллик муддатга IJF президенти этиб сайланди

Венгрияда старт арафасида турган катталар ўртасидаги жаҳон чемпионати олдидан ўтказилган Конгрессда бир қатор масалалар муҳокама қилинди.

Улар орасида ташкилот президентлигига ўтказилган сайлов дзюдо оммасининг диққат марказида бўлди. Унда якдил, яъни бир овоздан 2007 йилдан бери IJF президенти бўлиб келаётган Мариус Визер янги муддатга қайта сайланди. 

"Ўтган 14 йил давомида сизлар билан ҳамжиҳатликда, ягона мақсад йўлида меҳнат қилдик. Ҳамкорликдаги олиб борган бу ишларимиз фаолиятимдаги энг ёрқин дамлар бўлди. Сизлар билан ишлаганимдан бағоят хурсандман. Бу мен учун катта шараф. Қатъий тартиб-интизом, ҳурмат ва садоқат орқали биз улкан ютуқларга эришдик. Барқарор ривожланишимизнинг асосий омиллари ҳам мен санаб ўтган жиҳатлар. Бугундан эса дунё дзюдосида янги давр бошланмоқда. Биз биргаликда муваффақиятни ривожлантиришда давом этамиз. Бу борада Халқаро олимпия қўмитаси билан кенг қамровдаги ҳамкорлигимиз ҳам муҳим омил бўляпти. 2009 йилдан дзюдо бўйича йиллик тақвим бўйича Жаҳон тур (Гран-при, "Катта Дубулға", "Мастерс") мусобақаларини бошладик. Бошланишига кўплаб муаммоларга дуч келдик. Лекин биргаликда бу қийинчиликларни енгиб ўтдик. Олдиндаги тўрт йил биз янада кўпроқ ишлашимиз керак. Қитъавий конфедерациялар ҳамда милллий федерацияларни янада кўпроқ қўллаб-қувватлаш асосий йўналишларимиздан бўлади. Ишончим комил, биз бирдамлик, ишонч ва ҳамжиҳатлик орқали дзюдони янги босқичга олиб чиқишга ҳаракат қиламиз", - деди Визер.