Мария Тимофеева биринчи ракеткани мағлуб этди ва финалга чиқди

Австралиянинг Брисбен шаҳрида теннис бўйича WTA 500 тоифасига кирувчи нуфузли турнирнинг саралаш баҳсларида финалчилар маълум бўлди. Йилнинг илк WTA турнирида Ўзбекистоннинг биринчи ва иккинчи ракеткалари ҳам муваффақиятли старт олишди. 

Иккинчи ракеткамиз Мария Тимофеева саралашнинг 1/2 финалида турнирнинг биринчи ракеткси, хорватиялик Антониа Рузични 7/5, 6/4 ҳисобида мағлубиятга учратди. Бир соату 42 дақиқа давом этган баҳсда Рузич 6, Тимофеева 1 та эйс зарбасини амалга оширган. 

Таққослаш учун, хорватиялик теннисчи WTA рейтингида 70, вакиламиз эса 143-ўринни эгаллаб турибди. Энди Тимофеева асосий тўрга йўлланма берувчи саралашнинг финал учрашувида Александра Сасновичга қарши кортга чиқади. Беларуслик теннисчи бугун 1/2 финалда болгариялик Виктория Томовани 6/2, 6/2 ҳисобида таслим этди.