Марокаш Гран-приси. Хуррамов бронза учун курашади

Мусобақанинг сўнгги кунида жами 5та вазн тоифасида баҳслар ўтказилмоқда. Эркаклар ўртасида -90, -100 ҳамда +100 кг, аёллар ўртасида эса -78 ҳамда +78 кг вазн тоифаларида ғолиб ва совриндорлар номи маълум бўлади. 

Бугун татамига чиқувчи тўрт нафар дзюдочимиздан фақат бирида медални қўлга киритиш учун имконияти бор. -100 кг вазнда юртимиз шарафини ҳимоя қилаётган Муҳаммадкарим Хуррамов бироздан сўнг ўтиш баҳсида канадалик Шеди Алнахасга қарши татамига чиқади. Ғолиб спортчи бронза медали учун кечадиган учрашувда иштирок этади. 

Маълумот учун, Хуррамов ўз иштирокини иккинчи босқичдан бошлади. У аввалига венгриялик Залан Охат, кейин жазоирлик Лайс Боуякубни мағлуб этди. Ярим финал йўлланмаси учун кечган баҳсда эса бельгиялик Тома Никифоровга имкониятни бой бериб қўйди.   

Ушбу вазн тоифасидаги иккинчи дзюдочимиз Шерали Жўраев эса голландиялик Симеон Катаринадан устун келди. Лекин қозоғистонлик рақиби Айбек Серикбаевга ютқазиб, мусобақадаги иштирокини тўхтатди.

Ўзбекистон дзюдо федерацияси матбуот хизмати