Майами "Мастерс" финалида сенсация! 19 ёшли "болакай" ўзидан салкам 20 ёш катта Жоковични мағлуб этди

ATP рейтингида 54-ўринни эгаллаб турган Якуб фаолиятидаги илк совринни "Мастерс" мусобақасида, теннис афсонаси, дунёнинг айни пайтдаги бешинчи ракеткаси Новак Жоковични мағлуб этгани ҳолда қўлга киритди. Меньшик 2 соату 5 дақиқа давом этган финал баҳсида 7/6(4), 7/6(4) ҳисобида зафар қучди. 

Теннисчиларнинг ўзаро учрашувларидаги ҳисоб мувозанати тикланди - 1:1. 19 ёшли Меньшик 14, 37 яшар Жокович 7 та эйс зарбасини амалга оширган. Иккала теннисчи ҳам 1 тадан қўшхатога йўл қўйган. Ҳар икки теннисчи ҳам биттадан брейкка эришди. 

Меньшик ўзи учун тарихий турнирдан 1000 рейтинг очкоси ҳамда 1 миллион 124 минг 380 АҚШ доллари миқдорида мукофот пулини қўлга киритди. У янгиланган рейтингда Топ-30`да дебют қилади. Якуб "Мастерс" чемпиони бўлган иккинчи чехга айланди. Бундан роппа-роса 20 йил олдин Томаш Бердих бу натижага эришганди. 

Агар Жокович финалда ғалаба қозонганида, фаолиятидаги 100-совринга эга чиққан бўларди. У вице-чемпионлигидан 650 очко ва $597,890 ишлаб олди.