Миллий антидопинг агентлиги томонидан семинар ўтказилди

Айни дамда, мазкур агентлик томонидан спорт федерациялари ва клублари тиббиёт ходимларининг малакасини оширишга кўмаклашиш, уларга спортда допинг қўлланилишининг олдини олиш ва антидопинг назоратини амалга ошириш борасида услубий ёрдам кўрсатиш, таълим дастурларини амалга ошириш, соғлом ва ҳалол спортнинг тарғиботи бўйича саъй-ҳаракатлар олиб борилмоқда.

Бунга мисол қилиб, Агентлик ходимлари томонидан Хоразм вилоятидаги Урганч ихтисослаштирилган олимпия захиралари мактаб-интернатида ўтказилган семинарни келтириб ўтишимиз мумкин.

Семинарда Хоразм вилояти жисмоний тарбия ва спорт бошқармаси, бошқарма тизимидаги ўқув муассасалари ва спорт мактаблари, Ўзбекистон талабалар спорти ассоциацияси вилоят минтақавий бўлими ва спорт федерациялари мутасаддилари иштирок этди.

Ушбу семинар жараёнида Миллий антидопинг Агентлигининг Допингга қарши курашишни тарғибот қилиш ва халқаро ҳамкорлик бўлими бошлиғи Раъно Исломова, Тест ўтказиш ва тезкор таҳлил қилиш бўлими бошлиғи Нодиржон Ҳошимовлар Агентлик олдига қўйилган асосий талаб, вазифалар ва йўналишлар ҳақида тушунчалар бериб, ҳамюртларимизга спортда допинг қўлланилишининг олдини олиш ва допингга қарши курашиш соҳасида ягона давлат сиёсатини амалга оширишда фаоллик кўрсатишлари лозимлигига алоҳида тўҳталишди.

Шунингдек, семинарда қатнашган Хоразм вилояти жисмоний тарбия ва спорт бошқармаси бошлиғи Шокир Мадаминов жойларда спортчилар билан тарғибот ишлари юритилаётгани, улар орасида допингга қарши тегишли учрашувлар ва суҳбатлар ташкил этилаётганлигини айтиб ўтди.

Мазмунан бой ва самарали ўтган семинарда иштирокчилар мутахассислардан ўзларини қизиқтирган саволларга жавоб олишди.