ММАчимиз финалда ўз юртдоши билан жанг қилишдан бош тортди

Ўзбекистон, Тожикистон, Қозоғистон ва Қирғизистон спортчилари ўртасида ўтган мазкур турнирда Абдулазиз Ўтамуродов қирғизистонлик рақиби Қодир Курстан ўғлини техник нокаут билан мағлубиятга учратди. Бекзод Нурматов эса яна бир Қирғизистон вакили Жакип Туганбаевни иккинчи раундда оғритувчи усулни қўллаган ҳолда таслим қилди. Шу тариқа сўнгги ҳал қилувчи финал босқичига икки ҳамюртимиз йўл олди.

- Мазкур турнир қоидаларига мувофиқ мен ва Бекзод финал учрашувида ўзаро жанг қилишга рози бўлмадик, - дейди А.Ўтамуродов. - Шу боис мусобақа ташкилотчилари ҳар биримизга “Батир баши” IV этно турнирининг камарини тақдим этди. Мусобақаларда ғалаба қозонишимда мураббийларимнинг маслаҳати ва қўллаб-қувватлаши муҳим омил бўлмоқда. Келгусида бундан ҳам юқори натижаларга эришиб, Ватанимиз шарафини янада юксалтиришда бор кучим ва маҳоратимни ишга соламан.