МОҚда антидопинг масалаларига бағишланган семинар бўлиб ўтди

Токиодаги XXXII Олимпия ва XVI Паралимпия ўйинларига тайёргарлик доирасида ўтказилган семинарда Миллий олимпия қўмитаси вакиллари, Ўзбекистон спорт федерация ва ассоциацияларидан ташриф буюрган мутасаддилар ва шифокорлар, Республика спорт тиббиёти илмий-амалий маркази шифокорлари ҳамда оммавий ахборот воситалари ходимлари иштирок этишди.

Семинарда Бутунжаҳон антидопинг агентлиги (WADA) эксперти, Қозоғистон Миллий антидопинг маркази директори Майра Бакашева тақдимот ўтказди.

Семинар давомида спортчилар манфаатини ҳимоя қилиш бўйича муҳим масалалар муҳокама қилинди. Спортчи, мураббий, тиббий ва техник ходимларнинг ҳуқуқ ва мажбуриятлари, спортда ҳалолликни таъминлаш масалалари ўрганилди. Ҳар 5 йилда янгиланиб турадиган Бутунжаҳон антидопинг кодекси кўриб чиқилди. Шунингдек, семинар иштирокчилари ўзларини қизиқтирган мавзулар юзасидан саволлар билан мурожаат қилишди.