Mubadala DC Open. Кудерметова дунёнинг 40-ракеткасини мағлуб этди

Мамлакатимизнинг учинчи ракеткаси Полина Кудерметова нуфузли мусобақанинг саралаш баҳсларидаги икки ғалабаси эвазига асосий тўрга йўлланма олганди. Вакиламиз 1/16 финалда ҳам ажойиб ғалабани қўлга киритди. Полина дунёнинг 40-ракеткаси, испаниялик 28 ёшли Кристина Букша устидан иродали ғалабага эришди - 5/7, 7/6(4), 6/0. 

Кудерметова иккинчи сетни тай-брекда ўз фойдасига ҳал қилганидан кейин ҳал қилувчи учинчи сетда рақибасига битта ҳам геймни ютиб олишига йўл қўймади. Икки соату 24 дақиқа давом этган баҳсда Полина 4, Кристина 1 та эйс зарбасини амалга оширди. Иккала теннисчи ҳам оз эмас, кўп эмас - 10 тадан қўшхатога йўл қўйган. 

Таққослаш учун, Кудерметова айни пайтда WTA рейтингида 108, Букша 40-ўринни эгаллаб турибди. Бу теннис маликаларининг ўзаро ўтказган илк учрашуви бўлди. Эртага ҳамюртимиз 1/8 финалда дунёнинг 10-ракеткаси, украиналик тажрибали Элина Свитолинага қарши кортга чиқади. Ушбу баҳс бизнинг вақт билан соат 19:00да бошланади.