Муҳаммад Мокаев Brave CF лигасидаги гонорарни ошкор қилди

Унинг таъкидлашича, лигадаги гонорари UFC’нинг амалдаги чемпиони, ҳар бир жанг учун тахминан 500 минг доллар оладиган Александр Пантожаникидан кам эмас.

"Тахминан шунча, ярим миллион доллар. UFC билан шартномамни узайтиришмаганида, Brave CF менга "Сен умуман қайғурма, биз сенга кўпроқ берамиз" дейишганди. Ростини айтсам, мен ҳатто Brave CF билан бирор марта шартномани кўрмаганман - улар менга санани, вазнни айтишади, мен турнирга келаман ва ҳоказо. Шартномамиз шунчаки оғзаки. Ҳеч қачон ҳеч қандай ҳужжатга имзо чекмаганмиз. Аммо менга пул топишдан кўра UFC камари қизиқроқ. Ҳозирча менинг мақсадим - ушбу дивизионда энг яхши эканлигимни исботлаш", - деди Мокаев "Ушатайка" каналига берган интервьюсида.

Аввалроқ, британиялик мағлубият нималигини билмай келаётган аралаш яккакураш устаси Камил Гаджиев билан суҳбатда келаси ҳафта Қатарда бўлиб ўтадиган UFC турнирига ташриф буюриши ва у ерда дунёнинг энг кучли лигаси раҳбарияти билан учрашув ўтказишини маълум қилганди.

Ўтган ҳафта охирида асли келиб чиқиши доғистонлик бўлган Мокаев иккинчи раундда ирландиялик Жерард Бернсни нокаутга учратиб, энг енгил вазн тоифасида вакант бўлган Brave CF чемпионлик камарини қўлга киритганди.