Муҳаммадзоҳид Суяров жаҳон чемпиони, яна икки шахматчимиз вице-чемпион!

Ушбу мусобақада дунёнинг 19 мамлакатидан 89 нафар шахматчи иштирок этмоқда. Улар орасида ўғил болаларда 22, қизларда эса 20 нафар халқаро унвонга эга шахматчилар бор. Ўзбекистондан 6 нафар шахматчи юртимиз шарафини ҳимоя қилмоқда.

Қувонарлиси, 20 ёшгача бўлган ёшлар ўртасида ўтказилган FIDE Рапид ва Блиц жаҳон чемпионатининг рапид йўналишида Муҳаммадзоҳид Суяров 9 имкониятдан 7,5 очко жамғариб, олтин медаль соҳиби бўлди. Яна бир ҳамюртимиз Муҳиддин Мадаминов 7 очко билан кумуш медалга эга чиқди. Беларуслик Денис Лазави қўшимча кўрсаткичларга кўра 7 очко билан бронза медалига сазовор бўлди. 

Қизлар ўртасидаги рапид баҳсларида Ўзбекистоннинг биринчи рақамли шахматчиси Афруза Ҳамдамова 6,5 очко тўплаб, жаҳон чемпионатининг кумуш медали билан тақдирланди. Қозоғистонлик Ксения Балабаева 7 очко билан жаҳон чемпиони бўлди. FIDE байроғи остида ҳаракат қилган россиялик Варвара Полякова қўшимчк кўрсаткичларга кўра 6,5 очко билан бронза медали соҳибаси бўлди. Тўққиз имкониятдан 6 очко тўплаган ҳамюртимиз Умида Омонова 5-ўриндан жой олди.