23 фев 09:10
Янгиликлар

Бокс/ММА

Мьянмалик UFC чемпионининг илк ҳимоя жанги тасдиқланди + ПОСТЕР

Рамазон Темировнинг вазнидаги амалдаги чемпион Жошуа Ван 26 сониядаёқ эндиликла собиқ чемпион Александра Пантожани мағлубиятга учратиб, камарини тортиб олганди.

У 11 апрель куни АҚШнинг Майами шаҳрида бўлиб ўтадиган UFC 327 турнирида энг енгил вазн тоифасидаги чемпионлик камарини ҳимоя қилади. Мьянмаликнинг рақиби дивизион рейтингида учинчи ўринни эгаллаб турган япониялик Тацуро Тайра бўлади. Бу ҳақда кеча Хьюстонда бўлиб ўтган турнирда хабар берилди.

Жошуа Ван ўтган йилнинг декабрь ойида дивизионнинг эндиликда собиқ чемпиони Александра Пантожани мағлубиятга учратган эди. Ўшанда жангнинг 26-сониясидаёқ Пантожа тирсагини чиқариб юбориши натижасида баҳс тўхтатилган ва техник ғалаба Ванга берилганди. Бунгача 24 ёшли Жошуа кетма-кет бешта жангда ғалаба қозонганди.

Япониялик 26 ёшли Тацуро Тайра эса 2024 йилнинг октябрь ойида Брендон Ройвалга ҳакамларнинг айри қарори билан ютқазганди. Кейин эса кетма-кет иккита жангда Юн Сун Парк ҳамда Брендон Моренони муддатидан олдин таслим этди. Тайра икки ғалабали серия билан келмоқда.

Қизиғи, Жошуа Ван ва Тацуро Тайра ўртасидаги тўқнашув икки осиёликнинг чемпионлик камари учун ўтказган илк жанги сифатида UFC тарихига киради.