Наҳотки? Етти йил аввалги уриниш ниҳоят амалга ошди - Тухугов Лобовга қарши жанг ўтказади

Ушбу жангни амалга ошириш учун илк уриниш 2018 йилда бўлганди. Аниқроғи, 2018 йилнинг октябрь ойида Канадада ташкил этилган турнирда уларнинг ўзаро жанги бўлиши керак эди. Ўшанда Зубайра ҳам, Артём ҳам UFC лигасида ўз жангларини ўтказарди. Хабиб Нурмагомедов ва Конор Макгрегор жамоалари ўртасидаги ўша машҳур бўлиб кетган даҳанаки жанг сабаб Тухугов - Лобанов жанги бекор қилинган эди.  

Орадан етти йил ўтиб, жангчилар PFL баннери остидаги турнирда ўзаро октагонда тўқнаш келадиган бўлишди. "Жангчи" ва "Рус болғаси" ўртасидаги жанг 3 октябрь куни Дубай шаҳрида ташкил этиладиган PFL турнири доирасида оралиқ вазн (75 кг) тоифасида ўтказилади. 

2018 йилда UFC`дан ҳайдалган 38 ёшли Артём Лобов BKFC, яъни қўлқопсиз жангларда ўз омадини синаб кўрди. Жейсон Найт ва Пол Малиньяжини очколар ҳисобига кўра таслим этган Артём кейин реванш жангида ўша Найтга нокаут билан ютқазиб қўйди. 2022 йилда Лобов украиналик боксчи Денис Беринчикка қарши кечган Киевдаги Mahatch FC турниридаги жангдан кейин профессионал фаолиятини якунлагани эълон қилганди. 

34 ёшли Зубайра Тухугов эса сўнгги бор 2023 йилнинг февраль ойида жанг ўтказганди. Ўшанда у Австралиянинг Перт шаҳри мезбонлик қилган UFC 284 турнирида Элвис Бренерга ҳакамларнинг айри қарори билан ютқазиб қўйган ва ўшандан кейин дунёнинг энг кучли Лигасини тарк этганди.