Наҳотки?! Усик Riyadh Season билан хайрлашиб, Америка промоутерига кетмоқда

Украиналик боксчи америкалик промоутер билан узоқ муддатли шартнома бўйича музокара олиб бормоқда. Унинг биринчи жанги Деонтей Уайлдерга қарши шу йилнинг баҳорига режалаштирилган. Бу ҳақда боксчининг менежери Эгис Климас The National нашрига берган интервьюсида маълум қилди.

"Усик ва Уайлдер ўртасидаги жангни кўришимиз эҳтимоли жуда юқори. Айни пайтда биз бунинг устида ишлаяпмиз ва узоқ муддатли шартномани муҳокама қиляпмиз. Уайлдер жамоаси билан музокаралар олиб борилмоқда. Биз Лас-Вегас ёки Лос-Анжелесни кўриб чиқамиз, саналар эса апрель ойининг охири ёки май ойининг боши. Уайлдер ва Усик ҳали ўзаро жанг ўтказмаган.

Ҳозирча айтаётган гапларим норасмий, лекин бу Америка Қўшма Штатларидан келган промоутерлик гуруҳи бўлади. Келажакда Riyadh Season билан тўлиқ ишламаймиз, дея олмайман. Усик у ерда ҳам жанг ўтказиши мумкин, бироқ ҳозирча бизда улардан ҳеч қандай таклиф йўқ", - деб айтган Климас Дубайда бўлиб ўтган Бутунжаҳон спорт саммитида нашр вакили билан суҳбатда.

Top Rank, PBC ва Golden Boy промоутерлик компаниялари АҚШ бокс бозоридаги етакчи ўйинчилар ҳисобланади. Бироқ Климас улар айнан ким билан ҳамкорлик қилмоқчи эканини ошкор қилишдан бош тортган. Шу билан бирга, менежер мижозининг яна камида икки йил жангларда фаол иштирок этишни режалаштираётганини тасдиқлади.

"Унинг ўзи айтганидек, яна камида икки йил бор. Унинг танасига киролмайман, лекин Усик ўзини кучли ҳис қилмоқда. Унинг фикрича, ҳали қўлқопларни михга илиш вақти эмас ва табиийки, Александр давом этишга тайёр", - дея тушунтирди Климас.