Наманганда эркин кураш бўйича халқаро турнир ўтказилди

Мамлакатимизда аҳоли, айниқса ёшларни спортга фаол жалб қилиш, иқтидорли спортчиларни қўллаб-қувватлаш, чекка ҳудудларда яшовчи ёшларнинг ҳам спорт билан шуғулланиши учун имконият яратиш масалалари давлатимиз ва ҳукуматимизнинг доимий эътиборида десак муболаға бўлмайди.

Жумладан, Наманган вилоятида ҳам ёшларни жисмоний тарбия ва спорт билан шуғулланишлари учун кенг имкониятлар яратилмоқда. Бунинг натижасида кўплаб жаҳон ва Осиё чемпионлари етишиб чиқмоқда.

Жисмоний тарбия ва спорт вазирлиги, вилоят жисмоний тарбия ва спорт бошқармаси, спорт курашлари ассоциацияси вилоят бўлими ҳамда Наманган Олимпия захиралари коллежи ҳамкорлигида Наманган Олимпия захиралари коллежида эркин кураш бўйича вилоят очиқ биринчилиги бўлиб ўтди. Ушбу мусобақада қўшни қирғизистонлик спортчилар билан биргаликда республикамизнинг 9 та вилояти ҳамда мезбон жамоа наманганликлар ғолиблик йўлида баҳс олиб боришди.

Мазкур турнирда 2003-2005 ва 2006-2008 йилларда туғилган ўсмирлар ҳамда ундан кичик ёшдаги 750 нафардан зиёд спортчилар 18 та вазнда гиламга чиқишди. Қизғин ва муросасиз кечган баҳслар якунига кўра ғолиб ва совриндорлар ташкилотчилар томонидан диплом, медаль ва эсдалик совғалари билан тақдирланишди.