Намангандаги намунали спорт мактабларидан бирининг фаолиятига назар ФОТОГАЛЕРЕЯ

Ўзбекистон Республикаси Жисмоний тарбия ва спорт вазирлиги томонидан тузилган ишчи гуруҳ Наманган вилоятида жисмоний тарбия ва спорт соҳасида аҳоли соғлиғини мустаҳкамлашга кўмаклашадиган аниқ дастурларни амалиётга жорий этиш, ёшларни спортга кенг жалб қилиш ва улар орасидан иқтидорли спортчиларни саралаб олиш, спорт турлари бўйича юқори натижаларни таъминлайдиган маҳоратли спортчилар билан миллий терма жамоаларни шакллантириш ва тренерлар учун қўшимча шарт-шароитлар яратиш бўйича амалга оширилаётган ишлар билан яқиндан танишмоқда.

Ишчи гуруҳ кеча вилоятнинг чекка туманларидан бири Норин туманида бўлди. Эътиборлиси, бу туман Наманган вилоятидаги «яшил» ҳудудларга кирувчи кам сонли туманлардан бири бўлиб, айни пайтда ёш спортчиларнинг машғулот олиб боришлари учун рухсат берилган.

Туманда 1478 нафар спортчи ёшларни ўзида қамраб оладиган Болалар-ўсмирлар спорт мактаби фаолият кўрсатмоқда. Мактабда 41 нафар тренер 20 та спорт тури бўйича ёшларга енгилмаслик сирларини ўргатишмоқда. Тренерларнинг 14 нафари олий маълумотли, яна 7 нафар тренер олий ўқув юртининг махсус сиртқи бўлимида таҳсил олмоқда.

БЎСМда бокс, эркин кураш ва гандбол спорт турлари алоҳида ривожланган бўлиб, айни пайтда 628 та спортчи ёшлар машғулотларда иштирок этмоқда. Бу спорт турлари бўйича бир нечта Жаҳон ва Осиё чемпионлари ҳамда қатор халқаро мусобақалар ғолиблари етишиб чиққан.

Норин туманида 164 мингга яқин аҳоли истиқомат қилаётган бўлиб, ушбу ҳудуд бокс, гандбол ва юнон-рум кураши спорт турларига ихтисослаштирилмоқда. Туман аҳолисининг қарийиб 37 минги спорт билан қамраб олинган. 19 мингга яқин аҳоли мунтазам спорт билан шуғулланмоқда. Уларга 250 дан ортиқ спорт иншоотлари хизмат кўрсатяпти.

Қуйида Норин тумани Болалар-ўсмирлар спорт мактаби фаолиятидан фото лавҳалар эътиборингизга ҳавола этилади: