Нэшвиллдаги турнирнинг асосий жанги тасдиқланди

Ташкилотчилар томонидан 12 июль куни АҚШнинг Теннеси штати Нэшвилл шаҳрида бўлиб ўтадиган навбатдаги UFC турнирининг марказий жанги эълон қилинди. Оқшомнинг асосий жанги оғир вазн тоифасида UFC чемпионлик камари учун собиқ даъвогар Деррик Льюис иштирокида ўтказилади. Америкалик 40 ёшли аралаш яккакураш устаси мағлубият нималигини билмай келаётган бразилиялик Таллисон Тейшейрага қарши октагонга чиқади.

Маълумот учун, Деррик Льюис сўнгги жангини 2024 йилнинг май ойида Родриго Насиментога қарши ўтказиб, рақибини учинчи раундда техник нокаутга учратди. "Қора ваҳший" бундан аввалги жангида Жаилтон Алмейдага имкониятни бой берган эди. 

Бразилиялик 25 ёшли Таллисон Тейшейра ўтган йили Contender Series саралаш турниридаги ғалабаси эвазига UFC шартномасини қўлга киритганди. Февраль ойида дунёнинг энг кучли Лигасида муваффақиятли дебют қилди. У Жастин Тафани 35 сонияда нокаутга учратди. 

Айни пайтда Деррик Льюис UFC оғир вазн тоифаси рейтигида 9-ўринни эгаллаб турибди. Тейшейра эса битта ғалабаси эвазига 14-поғонага кўтарилиб олди.