Нигина Абдураимова Швейцарияда иккинчи ўйинини ўтказди

Ушбу мусобақада ҳамюртимиз Нигина Абдураимованинг ҳам иштирок этаётгани ҳақида хабар берган эдик. Теннисчимиз яккаликнинг илк давра учрашувида германиялик Мона Бартелни 6/3, 6/4 ҳисобида мағлубиятга учратган эди. 

Ҳозиригна Абдураимова иккинчи даврада латвиялик Дарья Семинистаяга қарши кортга чиқди. Икки соату 27 дақиқа давом этган баҳсда Нигина рейтингда ўзидан қуйида бораётган рақибасига 4/6, 7/5, 4/6 ҳисобида имкониятни бой бериб, яккаликдаги иштирокини якунлади.  

Таққослаш учун, турнирда 8-рақам остида таснифланган Абдураимова айни пайтда жаҳон рейтингида 186, Дарья Семинистая эса 224-ўринни эгаллаб турибди. Бу теннисчиларнинг ўзаро ўтказган илк учрашуви эди. Энди мамлакатимизнинг биринчи ракеткаси бор эътиборини жуфтликдаги иштирокига қаратади.