Нима сабабдан Жаҳон чемпионатида фақат Руслан Нурудинов ва Акбар Жўраев иштирок этиши айтилди

"Сўнгги кунларда жамоатчилик орасида “Нега Жаҳон чемпионатида фақат Руслан Нурудинов ва Акбар Жўраев иштирок этмоқда? Қолган спортчиларимиз-чи ?” деган саволлар янграмоқда.

Ўзбекистон Оғир атлетика федерацияси шуни маълум қиладики, жорий йилги Жаҳон чемпионати ва ноябрь ойида Саудия Арабистонининг Ар-Риёд шаҳрида бўлиб ўтадиган Ислом бирдамлик ўйинлари орасидаги танаффус атиги бир ойни ташкил қилади. Спортчиларимизнинг жисмоний тайёргарлиги ва оптимал спорт формасини сақлаб қолиш мақсадида мураббийлар штаби келишилган ҳолда, Жаҳон чемпионатида фақат икки нафар вакилимиз – Руслан Нурудинов ва Акбар Жўраевни иштирок эттириш тўғрисида қарор қабул қилган. Ҳозирда терма жамоамизнинг қолган аъзолари барча эътиборини Ислом бирдамлик ўйинларига қаратиб, тайёргарликни давом эттирмоқда", дейилади ташкилот хабарида.

Маълумот учун, Руслан ва Акбар ЖЧда бир хил, 110 кг вазн тоифасидаги баҳсларда иштирок этади. Уларнинг чиқиши 10 октябрь куни, бизнинг вақт билан соат 22:30 да бўлиб ўтади.