Нима учун "Уимблдон"да ёмғир остида ўйнаб бўлмайди? Ахир футбол ўйналади-ку!

Бу йил ҳам шундай. "Уимблдон-2023" турнирида баъзи теннисчилар учинчи даврага йўл олишди. Айримлари эса ҳатто биринчи давра ўйинини ўтказишга ҳам улгуришмади. Барчаси сешанба ва чоршанба куни ёққан ёмғир сабабли. 

Шу сабабли савол туғилади: нима учун ёмғир остида теннис ўйнаб бўлмайди, ахир худди шундай чимда футбол ўйнашади-ку? 

Биринчидан, ёмғир сабаб чим сирпанчиқ ҳолатга келиб қолади, нафақат ёмғир вақтида, балки ёмғирдан кейин ҳам. Бунга сабаб - юқори босим. Шунинг учун масалан Новак Жоковичнинг Марказий кортдаги илк ўйинида муаммо юзага келди - ёпиқ кортда намлик ошиб кетди ва чим теннис ўйнаш учун яроқсиз ҳолга келди. Уни катта фенлар билан қуритишди ва сочиқлар билан артишди. Якунда қанчалик ғалати кўринмасин, вазият яхшиланди: Фақатгина корт томи очилиб, намлик юқорига чиқиб кетганидан сўнг. 

Лекин футбол чими ҳам ёмғирдан сўнг шундай сирпанчиқ бўлиб қоладику? Шундай. Лекин футболчиларнинг бутсалари остида узун тишлар бор. Теннисчиларнинг оёқ кийимлари эса резинка материалдан иборат бўлади. Бу эса ёмғир пайтида ўйин ўтказишга ҳалал беради. Теннисчиларда тезкор ҳаракатлар, тўхталиш ва бошланғич юқори тезлик кўп бўлади. Бундан ташқари, чимли қопламали кортларда теннисчилар қуруқ чимда ҳам дастлабки кунлари кўп сирпаниб кетишади. Чунки ўша паллада ҳам чимда бироз намлик бўлади. 

Унақада нима учун теннисчиларга ҳам футболчилар каби оёқ кийимлардан фойдаланишга рухсат йўқ? Бу ерда майдонга бўладиган юкламани ҳам ҳисобга олиш лозим. Футбол майдонларида ўртача уч кунда 90 дақиқалик ўйин бўлади. "Уимблдон"да эса марказий кортларда ўртача учта ўйин бўлади, қолган кортларда эса тўрттадан, баъзида бештадан ўйин бўлади. 

Футбол ўйинларида майдонларни қайта тиклашга вақт бўлади. Теннисда эса бунинг учун фақатгина бир кун бўлади. Шунинг учун теннисчиларнинг оёқ кийими юпқароқ бўлиши лозим. Ўз навбатида, бундай оёқ кийимларда ёмғир остида ўйнаш мумкин эмас.

Бошқа қопламали кортларда ёмғир остида ўйинлар ўтказилган ҳолатлар бўлган. Хард кортда енгил ёмғир остида ўйин ўтказиш мумкин. Тупроқли кортларда ҳам ўйнаш мумкин. Лекин бу ҳам ўйинчилар учун хавф солиб туради. 

sports.ru сайти асосида тайёрланди