Нодирбек Абдусатторов Рустам Қосимжоновнинг тарихий рекордини янгилади

Нидерландиянинг Вейк-ан-Зее шаҳрида шахмат бўйича нуфузли "Tata Steel Chess-2023" турнири бўлиб ўтмоқда.

Кеча "Мастерс" гуруҳида иштирок этаётган ҳамюртимиз Нодирбек Абдусатторов 5-тур доирасида норвегиялик Магнус Карлсенни мағлубиятга учратди ва гуруҳда 4 очко билан пешқадамга айланиб олди.

Шундан сўнг, Абдусатторовнинг FIDE рейтингидаги очколари сони 2731 тага етди ва Нодирбек бу борада Ўзбекистон шахмати тарихидаги энг яхши натижани қайд этди. Бунгача энг яхши натижа Рустам Қосимжоновга тегишли бўлиб турган эди. Қосимжонов 2015 йилда рейтингдаги очколари сонини 2715 тага етказиб, Ўзбек шахматчилари орасидаги энг яхши натижани қайд этган эди.

Абдусатторов бугун "Tata Steel Chess-2023" мусобақасининг 6-тури доирасида айни дамда мусобақа жадвалининг 3-поғонасида бораётган ҳиндистонлик Прагнанандага қарши дона суради. Ҳамюртимиз ушбу баҳсда оқ доналарда ҳаракат қилади. Баҳс Тошкент вақти билан 18:15 да бошланади.