Нодирбек Абдусатторов Sinquefield Cup 2025 2-турида амалдаги жаҳон чемпиони билан ўйнади

Grand Chess Tour’нинг якуний классик босқичи 29 августга қадар давом этади ва айланма тизимда 9 турдан иборат бўлади. Ушбу босқич GCT очколари учун сўнгги имконият ҳисобланади. Кечадан дунёнинг кўзга кўринган ва рейтинги юқори бўлган 10 нафар гроссмейстери бош соврин учун баҳс олиб бормоқда. 

Афсуски, Нодирбек Абдусатторов кетма-кет иккита партияда рақибларига ютқазиб қўйди ва совринли ўринлар учун курашиш имкониятии пасайтириб юборди. Биринчи турда Левон Аронянга мағлуб бўлган ҳамюртимиз 2-турда амалдаги жаҳон чемпиони, ҳиндистонлик гроссмейстер Гукеш Доммараджудан енгилди.

Ароняндан қабул қилинган мағлубиятга вақт камлиги сабаб бўлганди. Кеча эса Нодирбек ноаниқ ҳаракатлар эвазига ютқазди. Юришлардаги аниқлик фоизи 87.0 га 92.7 нисбатда бўлди. Гукеш 1-турда ватандоши Рамешбабу Праггнанандҳага мағлуб бўлганди. Прагг бу турда оқ доналарда Фабиано Каруана билан муросага келди. Франциялик Алиреза Фирузджа польшалик Ян-Криштоф Дудадан устун эканини исботлади. Қолган икки партия дуранг натижа билан якунига етди.   

Sinquefield Cup 2025. 2-тур натижалари:

Рамешбабу Праггнанадҳа (Ҳиндистон) - Фабиано Каруана (АҚШ) 1/2-1/2     

Левон Аронян (АҚШ) - Сэм Севиан (АҚШ) 1/2-1/2

Уэсли Со (АҚШ) - Максим Вашье-Лаграв (Франция) 1/2-1/2

Алиреза Фирузджа (Франция) - Ян-Криштоф Дуда (Польша) 1-0

Гукеш Доммараджу (Ҳиндистон) - Нодирбек Абдусатторов (Ўзбекистон) 1-0

Бугун Sinquefield Cup 2025 турнирида 3-тур учрашувлари ўтказилади. Бизнинг вақт билан соат 22:00да бошланадиган турда Нодирбек Абдусатторов оқ доналарда Рамешбабу Праггнанадҳага қарши баҳс олиб боради. Учинчи тур олдидан очко олмаган биргина ҳамюртимиз қолмоқда. Прагг 1,5 очко билан қўшимча кўрсаткичларга кўра 3-ўринни эгаллаб турибди. 

Sinquefield Cup 2025. 3-тур жуфтликлари:

Сэм Севиан (АҚШ) - Гукеш Доммараджу (Ҳиндистон) 

Нодирбек Абдусатторов (Ўзбекистон) - Рамешбабу Праггнанадҳа (Ҳиндистон) 

Фабиано Каруана (АҚШ) - Алиреза Фирузджа (Франция)      

Максим Вашье-Лаграв (Франция) - Левон Аронян (АҚШ) 

Ян-Криштоф Дуда (Польша) - Уэсли Со (АҚШ)