Нодирбек Абдусатторов сўнгги турда чиройли ғалабага эришди ва Sinquefield Cup`ни кучли учликда якунлади

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этди. Мусобақада дунёнинг 10 нафар кучли гроссмейстери бош соврин учун баҳс олиб борди. Улар орасида жаҳон чемпиони Нодирбек Абдусатторов (2762) ҳам бор эди. 

Турнирнинг сўнгги 9-турида ҳамюртимиз оқ доналарда мусобақанинг иккинчи рақамли шахматчиси, FIDE байроғи остида қатнашган россиялик Ян Непомняшийга қарши баҳс олиб борди ва чиройли ғалабага эришди. 

Шу тариқа, Нодирбек 2 ғалаба, 6 дуранг ва 1 мағлубият билан турнир жадвалида қўшимча кўрсаткичларга кўра 3-ўринни эгаллади. Тўртинчи поғонадаги Максим Вашье-Лаграв (Франция, 2721) ҳам мусобақани 5 очко билан якунлади. Француз гроссмейстери сўнгги турда амалдаги жаҳон чемпиони Дин Лижэнь (Хитой, 2745)ни мағлубиятга учратди. 

Тўққизинчи турнинг яна бир учрашувида ғалаба қайд этилди. Турнирнинг биринчи рақамли иштирокчиси Фабиано Каруана оқ доналарда Аниш Гири (Нидерландия, 2746)ни енгди. Бу билан америкалик шахматчи очколарини 5,5 тага етказиб, мусобақани 2-ўринда якунлади. 

Sinquefield Cup бош соврини Алиреза Фирузжа (Франция, 2751)га насиб этди. Фаранг гроссмейстери сўнгги 9-турда оқ доналарда Рамешбабу Прагнанандха (Ҳиндистон, 2749) билан муросага келди. Бу дуранг унга 6 очко билан турнир чемпиони бўлиш учун кифоя қилди.  

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).