Нодирбек Абдусатторов Superbet Poland Rapid & Blitz турниридан қанча гонорар ишлаб олди? Қолганларчи?

Мукофот жамғармаси 175 000 АҚШ долларини ташкил этган ушбу мусобақада дунёнинг кучли 10 нафар гроссмейстери бош соврин учун баҳс олиб борди. Икки кунлик рапид турнирида хитойлик Вэй И, блицда эса Магнус Карлсен биринчи ўринни эгаллади. Икки мусобақа якунларига кўра умумий ҳисобда Магнус Карлсен мусобақа ғолибига айланди. 

Норвегиялик жаҳон чемпиони бош соврин билан бирга 40 000 АҚШ доллари миқдоридаги мукофот пулини ҳам қўлга киритди. Иккинчи ўринни эгаллаган хитойлик Вэй 30 000, кучли учликка якун ясаган мезбон шахматчи Ян-Кшиштоф Дуда 25 000 долларга эа чиқди. Энг охирги ўриндаги ҳиндистонлик Гукеш ўз ҳамёнини 7 000 долларга бойитиб олди.  

Дунё рейтингида 5-ўринни эгаллаб турган ҳамюртимиз Нодирбек Абдусатторов эса 11 000 АҚШ доллари миқдоридаги мукофот пулига эга бўлди. Ҳамюртимиз рапидда 8 очко жамғариб, ҳиндистонлик Эригайси билан 6-7 ўринларни бўлишиб олган эди. Блиц баҳсларида эса 9,5 очко билан 5-поғонадан жой олди. Ёш жаҳон чемпионимиз умумий жадвалда 17,5 очко билан 6-ўринни эгаллади.