Нодирбек Жуманазаров жаҳон чемпионати совриндори! Умиджон Жалолов бугун олтин медаль учун гиламга чиқади

Дунё биринчилиги эркин кураш баҳсларининг иккинчи куни ҳам Ўзбекистон терма жамоаси учун нисбатан муваффақиятли келди. 57 кг вазнда юртимиз шарафини ҳимоя қилган Нодирбек Жуманазаров жаҳон чемпионатининг бронза медалига сазовор бўлди. У бронза учун кечган беллашувда украиналик Владислав Абрамовни 5:0 ҳисобида мағлубиятга учратди. 

65 кг вазнда курашган терма жамоамиз аъзоси Умиджон Жалолов саралаш баҳсларидан муваффақиятли ўтиб, финалга йўл олди. Ўсмирлар ва ёшлар ўртасидаги барча мусобақаларнинг чемпиони бўлган Жалолов 1/8 финалда украиналик Микита Гончаровни 3:2, 1/4 финалда озарбайжонлик Айхан Абдуллазадани 6:1, 1/2 финалда эса қирғизистонлик Билол Шарип уулуни 5:2 ҳисобида таслим этди. 

Бугун Умиджон Жалолов жаҳон чемпионатининг финалида ҳиндистонлик Сужит Сужитга қарши гиламга чиқади. Ушбу баҳс бизнинг вақт билан тахминан соат 21:00да бошланади.