Нодирбек Якуббоев Жаҳон кубоги 1/2 финалида!

Дунёнинг 206 нафар шахматчиси иштирокида бошланган нуфузли мусобақада бугун 1/4 финалнинг иккинчи партиялари ўйналди. Гроссмейстеримиз Нодирбек Якуббоев германиялик Александр Донченкога қарши кечган чорак финалнинг жавоб учрашувида ўзи учун керакли бўлган дуранг натижани қайд эта олди. Кечаги илк учрашувдаги ғалаба эвазига ҳисоб 1,5:0,5 кўринишига келди ва ҳамюртимиз Жаҳон кубогининг 1/2 финалига йўл олди. 

19 ёшли Жавоҳир Синдаров эса бугунги иккинчи партияда ҳам мескикалик рақиби Хосе Мартинес Алькантара билан дурангга имзо чекди. Эртага шахматчилар ҳал қилувчи тай-брекда ўзаро ҳисоб-китоб қилишади. Мексикалик бу шахматчи турнир кашфиётига айланиб улгургани ва учинчи босқичда Нодирбек Абдусатторовни мағлубиятга учратганини эслатиб ўтиш жоиз.