Нодирбек Якуббоев Польшадаги нуфузли турнирда пешқадамлик қилмоқда

Ўз тарихида 61-маротаба ташкил этилаётган ушбу мусобақа 7 та гуруҳда ўтказилаётган бўлиб, кучлилар жам бўлган “ALREH” гуруҳида ҳамюртимиз, халқаро гроссмейстер Нодирбек Якуббоев ҳам бош соврин учун кураш олиб бормоқда. Ушбу гуруҳдан 10 нафар гроссмейстер ўрин олган бўлиб, ғолиб 9 тур натижасига кўра аниқланади. 

“ALREH” гуруҳи иштирокчилари: Аравиндҳ Читҳамбарам (Ҳиндистон) – 2723, Игорь Коваленко (Украина) – 2676, Майкл Адамс (Англия) – 2663, Нодирбек Якуббоев (Ўзбекистон) – 2663, Маттиас Блуебаум (Германия) – 2660, Давид Навара (Чехия) – 2650, Радослав Войташек (Польша) – 2648, Матеуш Бартел (Польша) – 2576, Павел Тецлаф (Польша) – 2571, Ян Климковски (Польша) – 2517

Қувонарлиси, 5-турдан сўнг Нодирбек Якуббоев 3,5 очко билан қўшимча кўрсаткичларга кўра пешқадамлигини сақлаб қолди. Якуббоев 5-турда чехиялик таниқли гроссмейстер Давид Наварага қарши қора доналарда ўйнаб, дурангга имзо чекди. Бу турда қора доналарда ҳаракат қилганига қарамай, англиялик Майкл Адамсни мағлубиятга учратган германиялик Маттис Блуебаум очколарини 3,5 тага етказиб, учинчи ўринга кўтарилиб олди. Иккинчи поғонадаги Радослав Войташек ҳисобида ҳам 3,5 очко бор. Бугун 6-турда Нодирбек оқ доналарда мезбон шахматчи Павел Тецлавга қарши баҳс олиб боради.