13 май 07:53
Янгиликлар

Бокс/ММА

Нокдаунга учраган Ломаченко Линаресни нокаут билан енгди

Украиналик жаҳон чемпиони Василий Ломаченко ҳамда яна бир жаҳон чемпиони Хорхе Линарес чемпионлик жангида рингга кўтарилишди.

Ҳозиргина АҚШнинг Нью-Йорк шаҳридаги муҳташам Madison Square Garden аренасида ушбу жанг якунланди. Боксчилар 61,2 кг вазн тоифасида жанг ўтказишди. Уларнинг ҳар иккиси ҳам бир хилда 61,05 кг тош босишганди.

Ўн икки раундга мўлжалланган жанг ўнинчи раундда Ломаченконинг ғалабаси билан тугади. Олтинчи раундда нокдаун ҳолатига тушиб қолган украиналик чемпион вазиятни ижобий томонга ўнглай олди. Ўнинчи раундда зарбалар сериясини ўтказиб юборган Линарес рефери ҳисобни якунига етказганида ҳам ўрнидан кўтарила олмади.

Шу тариқа, иккинчи ярим енгил вазн тоифасида WBO йўналиши чемпиони ҳисобланган Ломаченко Линаресга тегишли енгил вазндаги WBA Super чемпионлик камарини ўзиники қилиб олди.